איך שטיי אונטער אַ באָקסערבוים
ווערטער : זשאַמע טעלעסין
מעלאָדיע : חווה אַלבערשטיין
איך שטיי אונטער אַ באָקסערבוים
אַ באָקסערבוים
צו אים דערקליבן כ'האָב זיך קוים,
איך האָב זיך קוים.
איך זיץ אונטער אַ פֿייַגנבוים,
אַ פֿייַגנבוים
אַרום איז גרין אַרום איז גרוים
ס'איז גרין און גרוים.
איך ליג אונטער אַ מאַנדלבוים
אַ מאַנדלבוים
ער איז געווען בייַ מיר אין טרוים
בייַ מיר אין טרוים.
אַ באָקסערבוים
אַ פֿייַגנבוים
אַ מאַנדלבוים
אין אויג אַ טרער האַלט אייַן זיך קוים
האַלט אייַן זיך קוים.