אלחנן אינדלמאַן: "פּורים-ליד"

אַלע שטיבּער זייַנען אָפֿן.

קליינע קינדער וואַרטן, האָפֿן

אַז די פּורים-שפילערס וועלן

קומען שפּילן בּייַ די שוועלן ;

און דיי וועלן שפּילן, זינגען,

טאַנצן פֿריילעך, פֿריילעך שפּרינגען.

קליינע קינדער וואַרטן, האָפֿן –

האָט עס טאַקע בּאַלד געטראָפֿן.

פלוצעם הערט זיך אַזאַ לויפֿן

איבּער גאַסן, איבּער הויפֿן.

טיר און טויער זייַנען אָפֿן,

פּורים-שפּילערס אָנגעלאָפֿן!

מאַסקעס רויטע, בּלויע, ווייַסע,

מיט אַ שפּיל און מיט אַ מעשה.

ס'איז אַ מעשה גאָרניט פֿריילעך,

מיט אַ גרויסען נאַר אַ מלך

און זייַן הויפּט, דעם רשע המן –

אַלע האָבּן פֿייַנט זייַן נאָמען.

קליינע קינדער וואַרטן, האָפֿן

אַז דער סוף וועט זייַן ניט בּיטער –

האָט עס טאַקע בּאַלד געטראָפֿן

ווייַל ס'איז גאָט דאָך אונדזער היטער.

בּאַלד פֿאַלט המן, ס'פֿאַלט דער רשע,

און דער סוף איז גאָר נישקשה :

אַלע זייַנען מיר צופֿרידן,

ס'איז אַ יום-טובֿ הייַנט בּייַ ייִדן.