אוי, אַ נאַכט אַ שיינע !

ווערטער און מוזיק : י. ל. קאהאן  words and music pubkished in 1927/8 by Y. L. Cahan[

אוי, אַ נאַכט אַ שיינע!

די נאַכט איז געווען אַזוי שיין:

אויף אַ בענקעלע זייַנען מיר געזעסן,

די לבנה האָט גענומען אַוועקגיין.

אויף אַ בענקעלע זייַנען מיר געזעסן,

מיר האָבן דאָרט פֿריילעך פֿאַרבראַכט:

וויפֿל רייד מיר האָבן אייַנגעטענהט,

קיין ענד האָבן מיר ביידע ניט געבראַכט.

-         וואָס זשע פֿאַר אַן ענד, ליבע, ווילסטו?

אַז כ'בין אַ יינגעלע און מוז צום זשערעב שטיין:

קיין קנס-מאָל קענען מיר ניט מאַכן,

דאָס קענסטו אַליין גוט פֿאַרשטיין.

-         גיב זשע מיר דייַן רעכטע הענטעלע

און שווער מיר צו, אַז דו האָסט מיך אמת ליב:

שווער מיר, אַז דו וועסט מיך נישט פֿאַרגעסן

ביזן טאָג פֿון דעם פֿינצטערן גריב.

-         מייַן רעכטע הענטעלע קען איך דיר ניט געבן -

כ'שווער דיר צו, אַז איך האָב דיך אמת ליב:

כ'שווער דיר, אַז איך וועל דיך נישט פֿאַרגעסן

ביז צום טאָג פֿון מייַן פֿינצטערן גריב.