ווער האָט אַזאַ יינגעלע?
פֿון דעם הימל צוגעשיקט
אַ מתּנה מיר,
מיט אַן אוצר מיך באַגליקט
האָט גאָט אָן אַ שיעור.
ליכטיק ווערט פֿאַר מיר מייַן וועלט,
ניט פֿון זונענשייַן,
קריגט מען דען פֿאַר אוצרות געלט
אַ יינגעלע ווי מייַן ?
רעפֿריין:
ווער האָט אַזאַ יינגעלע,
אַ לאַכל אַ קליינס?
אויגן ווי צוויי שטערנדלעך,
אַ נשמה אַ ריינס.
ליבער גאָט, איך בעט בייַ דיר,
שיץ און היט אים אָפּ פֿאַר מיר.
וואַך איבער מייַן יינגעלע,
אַ יינגעלע אַ קליינס!