יאַנקעס חתונה

משה קולבאַק [Moyshe Kulbak 1896-1940 ]

אין אַ גרויסן דאָרף, פֿריילעך איז אַצינד,

חתונה איז הייַנט בייַ יאַנקעס אַ קינד.

טראַ-לאַ-לאַ-לאַ, טראַ-לאַ-לאַ-לאַ,

חתונה איז הייַנט בייַ יאַנקעס אַ קינד.

אויף אַ גרויסן טיש שטייען פֿלעשער ווייַן,

יאַנקע, דער מחותּן, גיסט אין האַלדז אַרייַן.

טראַ-לאַ-לאַ-לאַ, טראַ-לאַ-לאַ-לאַ,

יאַנקע, דער מחותּן, גיסט אין האַלדז אַרייַן.

אין אַ לייַוונט קלייד, די כּלה אויסגעצירט:

דעם חתנס נייַע שטיוול מיט זשעגעכץ אויסגעשמירט.

טראַ-לאַ-לאַ-לאַ, טראַ-לאַ-לאַ-לאַ,

דעם חתנס נייַע שטיוול מיט זשעגעכץ אויסגעשמירט.

שטייט אַן אַלטער גוי אָנגעשפּאַרט אין וואַנט,

אַ האַרמאָשקע האַלט ער – ער איז דער מוזיקאַנט.

טראַ-לאַ-לאַ-לאַ, טראַ-לאַ-לאַ-לאַ,

אַ האַרמאָשקע האַלט ער – ער איז דער מוזיקאַנט.

ס'איז ניטאָ קיין שטולן, שטייט מען בייַ די ווענט:

נישטאָ קיין לעפֿל, גאָפּל, - עסט מען מיט די הענט.

טראַ-לאַ-לאַ-לאַ, טראַ-לאַ-לאַ-לאַ,

נישטאָ קיין לעפֿל, גאָפּל, - עסט מען מיט די הענט.