עקזעקוציע / אַבֿרהם סוצקעווער

 ( 1913- 2010)

[I]         גראָב איך אַ גרוב ווי מען דאַרף, ווי מען הייסט!

            זוך איך  בעת-מעשׂה אין דר'ערד אויך אַ טרייסט.

[II]        אַ גראָב און אַ שניט, און אַ ווערעמל קליין

            נעמט צאַפּלען פֿון אונטן – דאָס האַרץ קען צעגיין.

[III]        צעשנייַדט אים מייַן רידל, און ווונדער דערבייַ:

צעשניטערהייט ווערן צוויי, ווערן דרייַ:

[IV]         און ווייַטער אַ שניט, ווערן דרייַ, ווערן פֿיר:

און אַלע די לעבנס באַשאַפֿן דורך מיר?

[V]           קומט ווידער די זון אין מייַן טונקל געמיט

און אַ גלויבן נעמט שטאַרקן מייַן אָרעם:

[VI]         אויב אַ ווערעמל גיט אונטער דעם שניט,

ביסטו ווינציקער דען פֿון אַ וואָרעם?