לייג דייַן קאָפּ

ה. לייוויק (1888-1962)

לייג דייַן קאָפּ אויף מייַנע קני,

גוט אַזוי צו ליגן.

קינדער שלאָפֿן איין אַליין,

גרויסע דאַרף מען וויגן.

קינדער האָבן שפּילעכלעך,

שפּילן ווען זיי ווילן:

גרויסע שפּילן נאָר מיט זיך,

מוזן אייביק שפּילן.

האָב ניט מורא, איך בין דאָ,

וועל דיך ניט פֿאַרשטויסן, -

האָסט גענונג געוויינט שוין הייַנט,

ווי עס פאַסט אַ גרויסן.

אָנגעוויינט און אָנגעקלאָגט,

איך וועל דיך פֿאַרוויגן:

לייג דייַן קאָפ אויף מייַנע קני, -

גוט אַזוי צו ליגן...